Dolce Gusto Mini Me 咖啡機

每逢聖誕，不同公司都會推出很多優惠。而今次，我就不小心中了雀巢公司這部 Dolce Gusto Mini Me 咖啡機計，皆因今次個優惠，只要買12盒 capsule，部咖啡機就唔使錢送畀你，真係幾吸引既~

其實，本身我屋企已經有一部 espresso 半自動咖啡機，要自己磨豆，壓粉，打奶泡，同埋拉花。其實已經好夠玩，沖出嚟的咖啡都好好飲，咁點解要買咁點解要買多部 capsule 機呢? 主要都係因為貪方便。想放公司沖，容易整，容易清潔，又唔需要諗啲奶點樣搞，呢部嘢嘅 capsule 有埋奶，絕對易過買鮮奶來打泡。另外，又唔想成日俾錢連鎖咖啡店每次都要比最少二三十蚊買咖啡，所以，最後決定買咗呢部機。

本身，我對咖啡都有少少要求，至少，我平時沖嘅咖啡豆，都係啲即炒嘅豆，好少會去超級市場買一包包嗰啲豆嚟沖。所以，對於呢部咖啡機沖出嚟嘅咖啡，只可以話係普普通通，唔可以用個好字來形容。啲咖啡唔算好香，沖出嚟嘅 creama 亦都唔係好厚，比起自己磨豆嗰啲真係差好遠，對比連鎖咖啡店嗰啲都冇得比。啲奶嘅 capsule 我更加覺得有啲難頂，嗰陣奶味真係好人工，同鮮奶 相比，真係差好遠。對我嚟講，只可以用頂下癮來形容呢部咖啡機。

但係，如果係放響公司，用半自動咖啡機嚟整，同埋仲要打奶泡，根本上是沒有可能。 相反，這部咖啡機真是非常方便，沖一杯 cappuccino 都唔駛半分鐘。而且它的 capsule 選擇多，除了咖啡之外，還可以沖朱古力，tea latte ，聽講仲可以沖雀檸同美祿。因此，這部咖啡機總算有它存在的價值的。

其實，好多人都會問，包括我在內，佢同雀巢另外一部 nespresso 嘅 capsule 機係咪 兼容，如果唔係，係咪真係好大分別呢?首先，兩部機既 capsule 係唔兼容的，姐係你唔可以互相買大家既 capsule 插來插去的。而我個人認為，沖出黎既咖啡都真係都幾大分別。 nespresso 嗰部沖出嚟啲咖啡真係好香， 而且個 creama 亦都好厚。如果平時飲開 espresso 嘅話，我覺得用後者會比較好啲。 但是，對於我嚟講，飲咖啡係需要加奶 的話，nespresso 便要另外自己買鮮奶來整奶泡了。正如之前所講，響公司沖咖啡，最緊要夠方便。所以 nespresso 就唔係我的考慮了。

另外，關於 capsule 的回收問題，我嘗試過將個 capsule 打開，發覺呢部機嘅 capsule 結構都幾複雜。如果就咁攞去回收，真係有啲難度。劏開咗上面嗰層，中間會有層透明薄膜隔住咖啡粉。之後，就有啲錫紙同埋一件塑膠組件。相對嚟講， nespresso 部機嘅capsule 只有一個鋁製的組件。感覺上容易回收啲。

總括嚟講，如果你對咖啡好有要求，每一杯飲落肚嘅咖啡都一定要好好嘅話，呢部機一定唔係你嘅選擇。但係，如果你想方便嘅話， 又唔介意飲啲差少少嘅咖啡(講真又唔係太差嘅) 大家不妨諗下呢部啦，價錢唔貴，capsule 嘅選擇亦都很多。個人認為放公司真係好好用。