[親子泰國遊 – 吃喝篇] The Rain Tree Cafe

去到曼谷，好多人都話嗰度啲自助餐又平又好食。難得去一次旅行，當然要試下啦。今次我有個同事就介紹咗用一隻嚮泰國都好出名嘅app eatigo 嚟去 book 酒店自助餐。聽講最多可以有半價折扣㗎喎，咁筍嘅嘢梗係要試下啦。

其實我都係前兩日先走去 book ，所以有好多好出名嘅自助餐已經冇曬位喇。上網再搵下人地啲 comment ，畀我哋搵到呢間The Rain Tree Cafe，竟然仲有50%折扣。二話不說即刻 book 咗先，反正唔使畀錢住，book 左最多 cancel 返。 講番個酒店location，佢嚮 The Athenee Hotel ，即 Phloen Chit 站附近，由四面佛行過去大約 15 分鐘。對我地黎講，都算幾方便。

我哋 book 咗夜晚六點鐘，諗住去動物園之後去食。但係，我地又冇曬錢，所以去之前都走咗去林真香果度唱返啲泰銖先，順便趁機會買番啲手信。講起間林真香，佢嚮 Amarin Plaza (四面佛隔黎) 入面，唔好睇佢只係賣手信，原來仲有得唱錢，個 rate 仲好好! 搞下搞下，我地都遲咗九個字先去到。去到即刻開即 app 出嚟同佢講我哋 book 咗六點鐘。但係，佢搵嚟搵去都搵唔到我哋個 record 。又好喎，佢哋都照畀我哋入去，但係就唔知仲有冇折扣。坐定定之後，過咗一陣，佢就走嚟同我哋講，原來我哋book咗朝頭早六點鐘……下，無啦啦點會咁早六點鐘食酒店 buffet ?! 其實我都唔 sure 係咪真係我撳錯。但係，呢度啲 service 真係好好喎，佢即刻同我哋講唔使擔心，佢叫我哋攞隻 app 出嚟再 book 過。但係，開只 app 出嚟，7點鐘淨係得返7折。佢即刻同我講叫我揀個 10點鐘有半價既時間，佢話都可以做個半價優惠比我哋。我地聽到，真係十分驚喜! 估唔到佢地咁爽手。所以，呢件事已經對呢間酒店嘅自助餐十分有好感。

好喇，搞掂完啲細路乖乖地坐低晒之後，唔夠兩分鐘，就有個應該係高級經理既靚仔走咗過嚟，同我個大仔傾計，之後仲私人醒咗杯橙汁畀佢飲呀。如果換轉係香港，佢哋真係睬你都有味。比較之下，呢度嘅人真係非常親切，又好鍾意同細路仔玩，感覺又再加分。

終於到食嘢喇。由於啲細路食野真係煩到嘔，又要氹又要食呢樣又要食嗰樣又唔食呢樣又唔食嗰樣，搞咗好耐先餵飽佢哋，我哋先有得食。ai……做人父母就係咁㗎啦，點都係第一時間搞掂個仔先。所以，由於時間太趕嘅關係，都冇晒時間嘆下啲食物，都唔係好記得啲食物有幾好食了……但係，都記得食咗幾隻生蠔，少少刺身。熱盤其實都有好多選擇，亦都有好多泰國菜式，但係都係嗰句，湊住個仔都好難 enjoy 餐飯㗎喇。但係 我特別記得，嗰度有嚿朱古力非常好食，啲雪糕都好正，我兩個仔食到停唔到口。

最後埋單，成家人都係五百蚊港紙，連我個 4 歲既大仔佢地都 free 咗個入場費，真係抵到爛。見住佢哋好有微笑容好有禮貌咁羅張單過嚟，同香港嗰啲西口西面嘅真係有一個強烈嘅對比。呢間餐廳，真係值得推介! 食完之後，我地就試下搭篤篤返酒店。個大仔就覺得好正，反而今次細仔就有少少緊張。搭左 2 個字左右，我地就返到酒店了。

返到嚟香港，先發覺原來呢隻 app 都可以 book 一啲餐廳㗎喎，我就試咗去 book 沙田宜家傢私隔黎果間西餐廳。一個鐘前 book 都仲有位，同埋佢都有七折畀多我哋。雖然冇半價咁吸引，但係都算叫做慳番少少啦，唔錯唔錯。睇嚟，我哋之後都會成日用呢隻 app 訂位喇。