維記咖啡粉麵

深水埗呢間維記咖啡粉麵，都可以話係由細食到大喇。呢間野真係由朝到晚都有好多人排隊，佢哋嘅豬潤麵真係超級正。其實，我已經好多年冇嚟過喇，今日咁啱機緣巧合之下去咗深水埗，咁就當然要走去懷緬一下啦。

今日真係好彩，竟然唔使等位就可以入去食。坐低咗之後，其實都唔使睇餐牌，就已經知道要叫啲乜。今次我都係照舊叫咗個潤牛麵，咖央西多，同埋凍奶茶。我哋兩公婆當下午茶食，已經非常足夠。質素呢，感覺同幾年前一樣，都一樣咁好味! 啲豬潤同牛肉好鬆軟，味道唔會好濃太鹹，啱啱好。咖央西多入面啲咖央醬，配合個炸得啱啱好嘅西多，真係絕配。凍奶茶亦都同之前一樣，冇乜點改過。

反而，去幫襯咗咁多年，今次都係第一次去佢哋個廁所。我初頭諗住一定污糟到不得了啦，但係又唔係喎。我可以肯定，佢個廁所一定乾淨個麥當勞嗰個。呢個有真係有啲驚喜喎~

呢家維記咖啡粉麵，真係少數可以咁多年都屹立不倒既茶餐廳。希望佢可以繼續經營落去，唔會畀啲租金淘汰咗啦。呢啲咁有特色既餐廳，真係越來越少喇。趁佢哋仲未執晒，真係要好好珍惜。