通渠神器 – Drain Buster

前一排個浴缸塞左， 搞咗成個星期都搞唔掂。用左平時最傳統嗰隻紅色通渠泵又唔得，獅王通渠佬又唔得，最後買咗兩次飛魚牌倒落去都唔得，搞極都搞唔掂……

最後差啲放棄走去搵人上嚟通，但係行行下街市嘅時候，畀我發雜貨舖有個睇落好似好強勁嘅通渠泵賣，上面寫住“世上最強既通渠泵”，再睇下個價錢 $59 唔係好貴，問下個師傅，佢話呢個好勁應該得，如果唔得仲有一個方法，就係買條通渠鍊，well……真係冇諗過自己通都可以專業到咁……佢話幾百蚊咁貴俾人通，自己買呢啲通都係一樣㗎咋……結果我就真係買咗返屋企試下啦，希望冇比人昆啦……

個泵睇落去好 pro ，set 野跟左一個大嘴同一個細嘴 ; 大嘴就用黎通馬桶，細呢就用嚟通洗手盆同浴缸嗰啲。好，開滿水，然後一泵落去，真係不得了…… D 坑渠水由嗰個爛咗嘅浴缸出水掣個窿度射晒啲坑渠水出嚟，搞到我成身都係……. 但係睇客觀 D 睇，應該幾 work。

之後，我就攞咗個普通嘅紅色泵吸住個窿，等啲水唔好射出嚟，然後再泵。泵左幾下，feel到有啲唔同喎…… 終於，再泵多 5, 6 下， D 水終於溜走曬喇…… 果然係世上最勁嘅通渠泵，幫我慳番幾百蚊！