旅遊, 親子

[親子泰國遊 – 購物篇] 水門夜市

陳七 10/04/2018

帶住細路，就算黎到泰國，都真係唔駛諗可以去周圍去瘋狂買野。但係難得黎到，又冇理由唔去買啲手信架……所以，我地都安排左一晚帶佢地去行下啲 local 少少既夜市。對我地黎講，行水門夜市都算幾適合。一來我地住 Chit Lom 站附近，酒店行過去都唔算遠，大約 15 分鐘就得; 二來個夜市近間好出名既水門雞飯，可以順路去試下。

由我地酒店出發，經過四面佛，一直去，沿 Central World 對面個名店商場 Gaysorn Village 行，經過 Big C，曼谷市內運河，再過條馬路就到了。有個驚喜位，就係呢條路推 BB 車竟然唔駛點托上托落，啲石級旁邊好多都做左斜路仔，係最後過馬路果下托左一次，都算係幾好了。

我哋去到，第一時間就走去搵啲嘢食先。知道呢度有間好出名嘅水門雞飯，二話不說就走去試下啦。去到好容易搵，間餐廳啲職員都係著粉紅色衫嘅。同埋我地幾好彩，唔使點排隊，大概 5 分鐘就可以入到去，以出名嘅餐廳黎講都算係咁啦。好喇，入到去，當然叫個水門雞飯啦。我地仲叫左一條煎魚，湯，炒菜，椰青咁，咁多個餸都係幾十蚊港紙，真係好平。味道又點呢? 我覺得個水門雞就普普通通，冇我想像中咁好食，可能香港食到果啲已經好好。反而條煎魚就有驚喜，都幾新鮮，同埋脆卜卜，攞嚟送椰青水真係幾好。我哋仲喺出面買咗個芒果我哋仲喺出面買咗個芒果糯米飯入去食，平平地食到咁多野真係幾爽。

好喇，食完嘢，就過去對面個水門夜市行。去到睇落去有啲似女人街，好多都係啲賣下衫呀買下鞋呀鎖匙扣磁石貼之類嘅手信。我睇到就覺得冇乜特別，但係我老婆同個仔睇完就覺得好似發現新大陸咁，兩眼發晒光。檔檔都停喺度睇咗好耐，悶到我飛起…… 最後，我老婆同個仔都有啲斬獲，我就當然乜都冇買啦。行咗一個鐘左右，我哋就返酒店喇。