旅遊, 親子恐龍, 泰國

[親子泰國遊 – 玩樂篇] Dinosaur Planet

陳七 27/03/2018

帶住兩條靚仔，出發前一定要搵定啲嘢啱佢哋玩。呢個 Dinosaur Planet 其實一開始 plan 行程時都有睇過，但睇落都係一般，所以本來都唔想去。但係，有一次畀我個大仔發現到我哋 plan 行程嘅時候個網頁上面 show 咗隻恐龍，佢就話好想去呢度……咁冇計啦，畀佢見到，佢又好似有啲興趣，咁我哋就決定加入呢個 checkpoint 喇。

呢個 Dinosaur Planet 嚮 Phrom Phong 站附近，BTS 站行過去大概 5 分鐘左右。由我地酒店附近嘅 Chit Lom 站搭過去都係 4 個站，大概 10 分鐘就去到。Phrom Phong 站附近除左睇恐龍外，仲有間榮泰魚蛋粉都係幾出名，我哋都去食埋早餐先。之後仲有個大型商場 EmQuartier ，入面有間好好食嘅泰國菜 Kub Kao Kub Pla，我地就嚮呢度食埋lunch。

去到大門口，見到好多好大隻嘅恐龍喺入邊，但睇落去又唔係好多遊客喎，感覺有少少似以前荔園就嚟執既時候。之後老婆同我講，原來呢個樂園都真係就嚟執喇喎，佢話去到下年 1 月……都好啦，佢執之前都可以去一次。

其實入到去，啲恐龍都整得幾神似，有啲仲有幾層樓咁高，有好多仲識旭! 我個細仔，開始嘅時候就比啲恐龍嚇親，但玩玩下佢又覺得好得意喎。呢度行下，果度行下，去到一個位有恐龍騎，小朋友就最開心! 隻恐龍行得好慢，但可以轉左轉右，櫈下櫈下都幾搞笑。而呢個騎恐龍場中間仲有個沙池，有啲工具比小朋友發掘沙入面既恐龍骨，我兩個仔都玩到唔捨得走! 之後，去左睇一個 4D 既恐龍影院，大人就冇乜特別，小朋友反而睇得好開心。最後，因為肚餓，我地去埋手信店玩左陣就去食野了。

講到食野，不得不介紹一下 Dinosaur Planet 附近個大型商場 EmQuartier，入面其實有好多名店，亦都有好多好野食，感覺就好似朗豪坊咁。我就係襯啲小朋友玩緊沙時，上網搵下附近有乜好食，就比我搵到間泰國菜 Kub Kao Kub Pla 好似好多人介紹，咁我地就嚮呢度食 lunch 了。其實，呢間野都唔平，成五六十蚊港紙一碟，但就真係幾好食，同埋環境都好舒服，帶住細路呢種餐廳都算好合適。