[真男人系列] 換水喉

真係衰開有條路……之前先通完渠，依家又到另一樣嘢壞咗，就係廚房嗰條水喉， 裂咗少少，搞到啲水滴咗落去啲廚具嗰度。作為一個有責任嘅男人，梗係要搵啲時間修理下啦。

其實爆咗嗰個位，係牆身水喉駁上去廚房昇盤嗰個 L型轉駁喉。一發現的時候，其實已經見到佢有好多銹漬，有啲水滴嚮個表面。由於我都係第一次換水喉，所以都試下停咗昇盤下面個水掣睇下係咪嗰兩個位先。停咗，冇水出喇，咁即係啱咗啦，咁就影咗幾張相，試下走落去啲五金舖搵下有冇呢個part換啦。

一落到去，同佢講個情況之後，佢就叫我換個銅喉啦，三十幾蚊兩個，接受到啦，如果出去畀人整，都一定唔止呢個數。跟住吹水嘅時候，佢問我點樣閂水掣，我咪話閂昇盆下面嗰兩個水掣囉……佢話: 你真係好彩喎，咁都冇拎斷個水掣……原來，佢話如果有廿年樓，好多時個水掣已經生左銹唔 work ，拎嘅時候就會斷咗。我聽到真係心都離一離，唔係真係咁容易斷 fa……佢話安全啲嘅做法，係走去搵管理處閂咗水錶房嗰個水掣。咁有啲麻煩，但係安全啲。冇計啦，自己衡量。

好，萬事俱備，返到屋企就即刻打落去管理處叫佢閂水掣啦，之後試下開條喉喇。開嘅時候都要用啲力喎，唔知係咪真係有番咁上下樓齡，條喉都已經生銹。我先要用個水喉鉗揼咗幾下，等佢鬆咗少少先，再拎會容易啲。一開嘅時候，真係不得了，嗰條喉入面已經生曬黑蚊蚊既銹，嗰條水管生銹到塞住咗個出水窿。我心諗，我地每日飲嘅水就係由呢條喉度出嚟，我地喺度飲緊啲乜嘢呀?!😵 好彩，我一早裝咗個濾水器，叫做filter下啲水質啦……都係隻眼開隻眼閉，快啲搞掂咗佢先再算。

拎返落去嘅時候，就要有少少技巧。因為我呢啲係舊嘅喉，條喉入邊冇個膠圈塞住。所以，上返上去之前，要捲幾圈水喉膠布先。呢個位真係要小心，唔係捲兩個圈包住咗條喉就得，最少都要包十幾個圈。同埋，聽講 順時針咁樣捲會好啲。捲完之後就開始拎返個水喉上去。呢一個又係一個好難嘅位，尤其是多咗水喉膠布，拎上去嘅時候就更艱難。出盡九牛二虎之力，最後終於上咗上去喇。打落去樓下管理處，叫佢開返個水掣試下。試水時，開住個水至少都 5 分鐘。跟住，攞張紙巾印下個駁位，睇下有冇水漬。大鑊，張紙有少少濕咗，不過唔係好多。ai… 整開就整好佢啦，又打去管理處叫佢閂水掣，開返條喉又再靈實多少少，再試。今次好掂喇，開咗一輪水都冇水漬，咁就當大功告成喇，觀察多一個禮拜睇下有冇水再滴落黎先。

過咗一個禮拜，睇落都好似冇問題，咁就當搞掂啦! 所以話，唔試唔知身體好，咁大個仔，真係冇諗過會換水喉。試過之後，又發覺唔係真係咁難喎，一嚟慳番啲錢啦，二嚟，作為一個真男， 幫屋企維修下家居電器是常識吧。