[真男人系列] 廁所水箱

真係想講句粗口，頂……又壞左個廁所水箱!? 有冇咁黑仔呀……啱啱先搞掂完條水喉，又到個水箱壞?! 天呀……你係咪要玩我呀? 你好嘢，又俾我識多一樣嘢喇，你玩我唔起嘅……廁所水箱之嘛，好易搞啫……

我個水箱唔係撳掣嗰隻，係舊式拉水掣嗰隻水箱。佢個原理係喺個拉水掣嗰度，用條鐵鏈仔綁住個膠塞。拉水嘅時候，就會抽起個塞，咁啲水就可以留落去衝廁喇。咁今次壞嗰個地方喺邊度呢? 就係嗰個膠塞。由於間屋有番咁多年歷史，所以蚊得多，駁住鐵鏈果個位就斷左了。開頭既時候，我試用啲熱溶膠黐實佢，但黐咗一個禮拜又斷，再黐，再斷……結果的起心肝，就去五金舖嗰度問下點整。原來，買個膠塞換落去就得。呢舊嘢，原來廿蚊就買到，頂……總之一早就換啦。

其實換個過程唔係好難。一開始，沖走曬啲水，用少少力拉走本來個塞，再換新果個上去就得。新果個塞記住有個保護蓋，要拆走佢先裝。裝完之後，反而嗰條鏈有啲難搞，因為佢就咁勾咗響嗰個拉水掣度，拉水時好容易甩。所以，要攞個鉗仔大大力鉗實佢， 咁就大功告成啦。