沙田污水處理廠開放日
啱啱嗰個星期六，喺沙田污水處理廠嘅開放日，我哋一家大細都走咗去參觀下。 平時搭車經過就見得多，真係入去都係第一次。去之前，其實都有啲猶疑，個污水處理廠咁臭，做乜咁傻仔要去呢? 即係，如果堆填區開放日，你都唔會去啦! 當然，最後更係屈服咗屋企嘅財政大臣啦，佢叫你去你有得唔去咩?
好喇，講返呢個開放日，其實渠務處都安排得好貼心，有 shuttle bus 由沙田或者大學火車站接送過去。 我哋就選擇嚮大學站上車。佢哋啲指示都好清晰，而且仲派咗個小丑姐姐響大學站扭氣球畀啲小朋友㖭! 啲 shuttle 都幾密下，等咗五分鐘左右就開車。
一去到，啲職員已經好開心咁企喺度歡迎，仲即刻派左 d 紀念品畀大家，呢啲小朋友就最開心。去到，老婆就即刻走去排個導賞團，而我就帶住兩個細路去隔黎個資訊中心參觀。 嗰度有卡通片介紹 d 污水由屋企流走之後會點樣處理，都幾啱小朋友睇。睇完卡通片，就行去玩下啲攤位遊戲。呢度 d 職員都真係幾細心咁介紹渠務處嘅工作同埋威水野畀大家聽，都幾有教育意義。
玩咗一陣，就開始個導賞團啦。唔好睇導賞團個叔叔年紀有番咁上下，佢講嘅嘢都幾 technical 架喎。佢一路行，一路介紹下佢地個廠點做到污水處理，介紹得都幾詳細。但係，污水處理廠都真係幾臭下，行左一半我哋就走咗了……之後，就繼續帶啲細路玩下遊戲咁。
行行下，發覺有兩架美食車停咗喺污水廠入面喎……well，停喺污水廠賣美食呢個係咩玩法? 不過，最後我哋都忍唔住買咗隻雞髀食下，食完都覺得自己好低能……行下行下，行到啲攤位都收曬，咁就搭返車返去大學站喇。
之前，我成日覺得去呢 d 地方參觀好無聊，都係玩下攤位咁。但原來，對小朋友黎講，佢地印象會好深刻。至少，佢哋返屋企洗手嘅時候，佢會問我，d水係咪流咗去污水處理廠啦? 我哋唔可以咁嘥水㗎! 真係估唔到喎!
