搖滾大俠奏

之前上網見到有報導講阿 paul、Joey Tang 、夏韶聲、豹哥同恭碩良會一齊夾隊 Hong Kong Band 搞個演唱會。估唔到機緣巧合之下，竟然有 4 張免費飛可以去，所以就拉埋我老婆同埋啲親戚去聽喇。

利申先，我自己係鐘意聽 beyond 歌既，所以，見到有黃貫中，我已經好happy，對呢個演唱會都有少少期望。Joey Tang 啲結他正就不在話下啦，但恭碩良既鼓更加係不得了。一個鐘意 Rock 歌既人黎講，呢個應該係個幾正嘅音樂會。而我最大嘅一個 concern，就係我老婆佢哋平時唔係點聽開 Rock 歌，我驚佢哋聽唔慣，覺得嘈頂唔順……(註: 之後仲會拖埋我老婆 11 月去聽Guns & Roses😆) 不過唔理喇，自己 high 咗先啦，佢哋頂唔順到時自己走佬😝

講返個演唱會，由 “紅色跑車” 同 “我是憤怒” 揭開序幕。呢個都係我預期之內，一個香港既搖滾音樂會，一定唔少得呢兩首歌。之後，佢哋各自演繹自己嘅歌。對我嚟講，梗係最留意 beyond 嘅歌啦。當中有一首我由細學結他彈到大嘅 “灰色軌跡” ，live 聽真係好感動。而更加驚喜嘅係，竟然請咗葉世榮做嘉賓! 我咁耐以嚟，其實都冇 live 睇過 beyond 嘅演唱會。雖然而家個葉世榮已經唔係以前 beyond 嗰個，但係作為一個beyond fans，都當叫做睇左半個 beyond 演唱會架喇! 另外，有個位又真係估唔到，就係豹哥講家駒走咗嘅時候，竟然灑下男兒淚。阿 paul 安慰佢，話雖然佢走咗，但係佢嘅歌將會永遠長存，真係講得好啱! 好喇，又講番個演唱會先。雖然話係搖滾大俠奏，其實除咗頭頭尾尾嗰啲好搖滾之外，其實中間都夾咗好多慢歌，有啲 unplugged 嘅時間 。所以，我啲親戚都好頂得順😌 老實講，對於我嚟講，我反而覺得個演唱唔夠 Rock，係黃貫中叫做比較 Rock 嘅一個。其他嗰啲，我覺得都係偏向係商業化味道多啲，不喜勿插。

同埋仲有一個位，唔知係咪年紀嘅問題，我個人覺得個演唱會本應好有型好 high，但有啲位始終係有少少土味。而啲觀眾聽緊啲本來好 Rock 既歌既時候，都好似冇乜反應咁。對於我喜歡 Rock sound 嘅人嚟講，真係好希望 Hong Kong Band 可以吸引而家啲後生仔對於夾 band 嘅樂趣，令到香港既樂壇唔好咁單一化，可以好似 80/90 年代時百花齊放既情境。