大學買notebook優惠 – Lenovo yoga 730
話說我部舊電腦已經用左成 10 年, 用到個殼都爆晒，keyboard 都換左 3 次，個頭都壞埋要駁個 external keyboard……今年，終於頂唔住要換機了。
本身我做 IT，對電腦都有啲要求。因此，我個 target 最少要有 i7 第 8 代，16GB RAM，256 SSD，13″ mon。其次，都好想部機可以當 tablet 用，因為我覺得， win 10 既設計好明顯係 for tablet friendly。本來，我 target 左 HP 部 Spectre X360，部野超靚仔，一羅上手就覺得好正。不過要成 HK$16,000……太貴了。之後又睇過部 Dell xps 2 in 1，都要 HK$ 14,000。最後，睇下睇下，我 friend 子話中大舊生買 notebook 都有得平，咁等到 16/8 就上去個網睇一睇啦。
唔睇由自可，一睇真係不得了，搵到部 Lenovo yoga 730，同 HP 果部 config 大部分一樣，不過賣 HK$9,000!!!! 你冇聽錯，真係咁平! 即係比 HP 嗰部平咗成HK$7,000。雖然 Lenovo 個朵真係唔係咁好，但同 config 平咁多又真係講唔過去買部 HP 喎……結果，嗰晚即刻上網訂咗喇，um……用銀聯卡仲減咗 HK$300 ，最後部電腦個價錢折實咗都係八千幾唔使九千😱 仲要唔駛一個星期就有得羅，Lenovo 今次真係直接 KO 對手……
其實，睇咗好多網頁，唔知點解，都冇乜人推介呢部機。就算去 D 大型電器鋪，都冇 display。其實，以數字黎比較，config 真係唔差 ga wor，點解冇咩人講 ga lei? Um……由於個價錢太吸引，今次買機連 display 都未試過，唯有懷著中伏既心態等羅機喇。
羅貨真係好快，唔駛一個星期就有得羅。究竟呢部機得唔得呢? 一睇個盒，成個鞋盒咁，睇落幾有型，應該唔會差得去邊掛……果然，一羅部機出黎，手感好紮實，金屬質感，唔係膠機黎。而個厚度都好 ok，仲薄過個一亳子，重量就 1.19 kg，以 13″ 機黎講真係算好輕。試下打開先，個鉸好實淨，唔會鬆漂漂。再試下反到去 360° 個 tablet mode，算比想像中容易喎，同埋反完之後，羅上手感覺都幾好，唔會好奇怪。好喇，再睇下有啲咩野 port 先。部機有 2 個 thunderbolt 3 同 1 個 USB 3.0。以呢啲薄機黎講，有個 USB 3.0 會方便好多，因為我屋企仲有好多 devices 要用 USB 駁，好似手指啦，相機啦，card reader 啦，手話啦……最後，試埋個 keyboard ，打落都 OK ，回彈感還可以啦。um……對比 mac book 個 keyboard，一定好好多。暫時，就咁睇個樣，同之前睇果部 HP 比，冇 8 成似都有 7 成!
好喇，真係開機喇，做晒啲 windows 開始設定，大約 15 分鐘。之後第一樣野當然試下開機速度啦，SSD 10 秒內開到機是常識吧。用下個 touch pad，雖然唔係好大，不過用落都好暢順，按落左右兩個掣都 OK。同埋，佢都好似 mac 機咁 support 好多種「指法」。再睇下個 mon，又唔係網上睇到啲 comment 咁差喎~ 顏色幾 sharp，但光度就一般。好，之後就聽埋個 speaker。佢寫係 powered by JBL，唔太差，不過，notebook 內置 speaker，你唔好 expect 太多就是了。再試下部機既速度，開左photoshop，AI，VS Code……都唔會窒下窒下喎。但如果打機既就冇得計啦，部機得 internal display。不過如果有興趣，可以買個 external display 用 thunderbolt 駁，咁就打咩機都得啦。好，再試下個 tablet mode。今次經大學買呢個 package，係有包埋支 Active Pen 2。 呢支筆寫落真係超正，真係好似響紙度寫嘅感覺。再睇下個包裝，原來呢支筆係 Wacom 出嘅。Wacom 係出繪圖板嘅牌子，唔怪得咁正啦。用呢個 tablet mode，第時開會時畫下 wireframe，寫下 notes 都應該方便好多。 仲有，我始終覺得 win10 嘅設計好大程度上係為咗方便 tablet 用。所以，我真係好有興趣試下，如果部 notebook 變左 win10 tablet，可以將部機用到幾盡呢?
大大話話， 今次買notebook都睇咗成兩個月，本來睇中咗 HP 嗰部靚仔機，可以變 tablet，又可以做 notebook。但係，個價錢又真係令人卻步。搞下搞下，又估唔到俾我響大學優惠搵到呢一部性價比極高嘅電腦。雖然冇乜人介紹，但係我諗咗好耐，兩部機差成 HK$7,000，真係冇乜理由唔買呢部lor……. 真心覺得，呢部機嘅性價比冇得輸，爭在係 lenovo 呢個牌子，有啲人可能唔係好鍾意啦 (其實我都唔係太鍾意，不過睇錢份上……)。話雖如此，其實我上一部 notebook 都係 lenovo，捱下捱下都用咗成十年……咁又真係冇得計嘅，買電腦電器既野，都真係睇下好唔好彩。 Anyway， 如果大家需要買電腦嘅話，我真係強烈推介大家諗下呢一部 lenovo Yoga 730，可能會畀到驚喜大家。
